Justice League Snyder Cut tlangzarh ni tur a chiang ta

Fan-te'n an nawr chhuah, Justice League Snyder Cut tlangzarh hun tur chu a chiang tawh a, HBO Max-ah March 18-ah tlanzarh a ni dawn.

Director Zack Snyder chuan Zirtawpni liam ta khan March 18 aṭangin HBO Max-ah a stream ṭan theih dawn tih hi poster pathum hmangin a tarlang a, he OTT Platform hi Snyder Cut en theihna hmasa tur niin India ramah erawh HBO Max hi a la hman theih loh avangin India mite chuan kan la nghah leh rih hlek a ngai mai thei.

Nikum August tlaa an buatsaih DC FanDome-ah khan Snyder chuan US ni lo ram danga fan-te pawh ngaihpawimawh an ni dawn tih leh a film tlangzarh tur chu an en ve theih ngei dan ngaihtuah a ni dawn tih a lo sawi tawh. India ram bikah chuan WarnerMedia-in  Netflix, Amazon Prime Video, leh Disney+ Hotstar-te a thawhpui avangin heng platform khawi emaw berah hian en theihin an tlangzarh ve thuai mahna.

Justice League hi kum 2017 khan tlangzarh a ni tawh a, project an zawh dawn aruaiah a fanu boral avangin Zack Snyder hian a tawpsan thut a, Joss Whedon chuan project hi a rawn zo a ni. Film tlangzarh a ni ta cheng a, fan-te beisei a pha lo a, director's cut tlangzarh phut hian social media leh kawng hrang hrang hmangin campaign an neih phah a, chu an campaign au thawm chu Warner Bros. hotute chuan an tihhlawhtlinsak ta a ni.