'BLACKPINK: The Show' a zo ta

Khawvel ram hrang hranga BLINKS awmte nghahhleh Blackpink online concert hmasa ber THE SHOW chu nimin khan YouTube kaltlangin neih a ni a, khawvel ram hrang hranga BLINKS awmte chu an phawklek a ni ber mai.

Rosé, Jisoo, Lisa leh Jennie-te hian an hla hit 'Kill This Love' hmangin show an hawng a, an album thar THE ALBUM-a hlate an sa bawk a, chung zingah chuan Crazy For You'. 'How You Like That' te pawh a tel. 'Playing With Fire', 'Lovesick Girls', leh 'Sour Candy' te pawh an sa bawk.

An hla lar tak takte an sak bakah hian an solo ṭheuh bawk a, chu chu an fan-te'n an lawm zual hle emaw tih mai tur a ni a, social media lamah an post hmuh tur a tam hle. Rosé chuan a solo debut 'Gone' lungkuai takin a sa a, he hla hi Blink lam chuan an la atchilh chho hle dawn tih a chiang. Lisa chuan fan-te rawn barakhaihin Doja Cat hla lar Say So a rawn sa a, ama duh ang takin a rawn her danglam. 

Jisoo chuan Tove Lo hit Habits (Stay High) hmangin a fan-te a awi ve bawk a, Jennie pawhin Solo perform bawkin a rap tel bawk a, hei pawh hi a fan-te chuan an lawm hle.