Jennifer Aniston TV show-ah kir leh dawn
American actress Jennifer Aniston chu kum 15 chhung TV show-a kan hmuh tawh loh hnuah, November 1 aṭanga chhuah tur Apple TV+ buatsaih American comedy-drama web television 'The Morning Show'-ah a inlan dawn.
Jennifer Aniston hi NBC sitcom tihchhuah, Friends comedy series aṭanga khawvelin a hmelhriat a ni a, he comedy series hi kum 1994, September 22 aṭanga 2004, May 6 thleng kha tihchhuah a ni.
'The Morning Show'-ah hian Friends comedy series-ah pawh lo lang ve tawh, Jill tia kan hriat lar Reese Witherspoon chu a thawhpui dawn bawk a ni. Aniston chuan he TV show-a an thawk dun tur hi a lawm hle tih a sawi. Aniston-te ṭhian dun bakah hian Gugu Mbatha-Raw, Billy Crudup, Mark Duplass leh Steve Carell-te pawh an chang ang.
Apple chuan American comedy-drama tihchhuah thar tur hi kum 2017 khan an lo sawi lawk tawh a, executive producer atan hian Jennifer Aniston, Reese Witherspoon, Kerry Ehrin, Michael Ellenberg, Mimi Leder, Kristin Hahn leh Lauren Levy Neustadter-te chu dah an ni. August 19 khan a trailer chu Apple lam hian mipuite en theih turin an pho chhuak tawh a ni.
He show thar tur hi 'sexual misconduct' lam hawi a ni dawn a, Los Angeles-a James Oviatt Building-ah nikum October 31 aṭang khan shot ṭan niin, kumin May thla khan first season chu zawh fel a ni. Aniston chuan, "Alex Levy angin ka chang dawn a, ka part lak tur hi ka film chan tawh zingah chuan har ka la tih berte zing a mi a ni," a ti.