Isuaa rinna nghah hi a pawimawh a ni : Bear Grylls

TV series lar tak Man vs. Wild aṭanga kan hriat lar Bear Grylls chuan mipuite hriatah, Isuaa rinna nghah a pawimawh zia Fox News-in a interview naah a sawi chhuak.

Kumin July 23 khan Bear-a ziah daily devotional 'Soul Fuel' tih lehkhabu kaihtawi chu tlangzarh a ni a, 'Soul Fuel' lehkhabu a ziah dan chungchang pawh sawiin, "Nitina harsatna hrang hrang ka tawh ṭhinte chu a hnehdan thuruk Isua zirtirna aṭangin ka chhar chuak a ni," tiin Bear-a chuan a sawi.

He a lehkhabu 'Soul Fuel'-ah hian inṭhian ṭhatna lamte, hlawhchhamnate, huaisennate leh hlauhthawnna chungchangte a ziak a, hengte hi nitina mihring­ten harsatna tawh ṭhin a ni a, engtia hneh chi nge tih leh, a hneh theih dante a ziak lang.

Vawi tam tak thih theihna tur lo pumpelh tawhtu Bear Grylls hian lehkhabu tam tak a ziak tawh a, heng a lehkhabuahte hian thihna lak ata a chhuah dante leh harsatna a hneh dante a ziak a ni. Bear-a hian phur taka thil a tih ṭhin chuan a puih mai bakah thlamuanna a neih theihna pawh a nih thu a sawi. 

Bear hi British Special Air Service (SAS) a nih laiin para­chute accident a tawh avangin a kal leh theih beisei a ni tawh lo. Mahse vanneihthlak takin a ṭha chhuak leh a ni. A lehkhabuah hian kum 25 mi a nih laia a pa in a thihsan chu a hun tawna a harsat lai ber  a nih thu a ziak lang.

Kumin April thla khan National Geographic buatsaih 'Hostile Planet with Bear Grylls' chu tihchhuah a ni a, Pathian thilsiamte leh kan ecosystem-te inkungkaihna ropui zia tarlanna turin he TV show hi buatsaih a ni. Bear Grylls hi  TV show 'Treasure Island'-ah pawh kan hmu leh dawn a ni.

Bear Grylls hian prime minister Narendra Modi pawh 'Man Vs Wild'-ah a lo inlan pui tawh a, a ṭawng­ṭaisak nghe nghe a nih kha.