Grammy Award 2019 Perform tur a chiang ta Cardi B, Camila, Mendes & Post Malone
Music khawvela chawimawina ngaihhlut ber te zinga mi Grammy Award chu thla thar tir khian sem a ni dawn a, tute nge perform ang tih chu mipui hriat chak a ni.
Tunah chuan a chhanna a awm ta a - Cardi B, Camila Cabello, Shawn Mendes leh Post Malone te chu Los Angeles khawpuia inlan tur te an ni. Anni bakah hian - Janelle Monáe, country stars Kacey Musgraves leh Dan + Shay te pawh perform tur zingah hian an tel.
A 'hot' dawn
Grammy Award hi zaithiam ten an ngaihlut em avangin perform tur pawh hi uluk taka thlan ṭhin a ni. Zaithiam tam takin inlan an chak a, chutih rual chuan a duh nazawng tan hmun a awm si lo.
Kumina perform turte pawh hi uluk taka thlanchhuah an ni ngei ang tih a rinawm a, top artist ṭhiau an ni. Hmeichhe rapper zinga 'hot' ber pawl Cardi B hi tunlai rapper zinga lar leh boruak nei lian ber te zinga mi niin, thlannahawm ber te zinga mi a ni. American rapper hi a che vel hmuh a chakawm tawh takzet.
American-Cuban singer Camila Cabello hi sawi hmaih hauh loh tur zinga mi a ni bawk. A hla hit 'Havana' avanga khawvel dengchhuak thei a ni a, Grammy Award-a perform awm ber te zinga mi a ni.
American rapper Post Malone hi kum 2018 chhunga rapper lar bera chhal ngam a ni a, stage mawitu satliah a ni lo ang tih chu thil chiang a ni. Candian Shawn Mendes a la awm cheu bawk a, ani hi boruak nei lian ber tur zinga mi a ni bawk.
Grammy Award dawng thei tura chhawpchhuah zinga mi Janelle Monáe a che dawn a, country star Kacey Musgraves leh Dan + Shay te sawi hmaih an thiang lo bawk.
Grammy Award vawi 61-na hi February 10 khian STAPLES Center, Los Angeles-ah sem a ni dawn a, he chawimawina ṭum 15 zet lo dawng tawh American singer Alicia Keys chuan a vawi khat nan a host dawn a ni.