Joe Alwyn-a'n lansarh a tum lo!

Mi lar tam takin an kawppui te nena an thla­lak dunna te social media lam­ah  tarlangin, an vawrhdarh nasa ṭhin hle. Hetih lai hian British actor Joe Alwyn erawh a ngaihdan a hrang daih a, chutianga chet vak chu ṭulin a hre lo!

American singer Taylor Swift nen kum hnih ṭha zet an inzui tawh a, chuti chung chuan an chanchin hi hriat tur a vang hle. Hei hi a chhan ber pawh  Joe Alwyn-a'n lansarh a duh loh vang niin an sawi. 

Kum 27 mi Joe Alwyn chuan, "Kawt­thlerah mi tam tak in hmu a, an chanchin in hriatpui vek lo. Chutiang bawkin kan chanchin hi mi zawng zawngin an hriat vek hi a ṭha ber lo a, 'keini' kan nih avanga an hriatna chhan tur pawh a awm chuang lo," tiin, lansarh chu thil ṭha ber a nih loh thu a sawi. 

Hemi chungchang hi tun hnai khan interview-ah sawichhuakin, an inkar thu a sawi thui duh lo hle. Khawvela zaithiam lar leh boruak nei lian ber te zinga mi Taylor Swift nen an inzui miau avang erawh chuan thil zawng zawng zep theih a ni lo. An chet velna leh kalna apiangah mipui mit fukna an ni a, mipui hriat tura an chanchin tarlan chu media te tum ber a ni bawk. 

Heti chung hian an chanchin hriat tur a tam lo hle a, vantlang hmuhah pawh an inzui chhuak tam lo hle. Hetih lai hian tun hnai khan New York khawpuiah an chhuak dun hmuh an ni a, Taylor Swift recording nei a ṭawiawm niin khawthlang media te chuan an tarlang.

Kum 27 mi Joe Alwyn leh Taylor Swift (29) te hi May, 2017 vel aṭang khan an inzui ṭan a ni.