Justin & Hailey Bieber March-ah an inkutsuih leh dawn

Nikum September thla khan a ruk thei ang berin an lo inkutsuih tawh a, an innei ngei em tih pawh a chiang lawk lo a nih kha. Khatiang lo deuh khan inneih buatsaih leh an tum a, a hun tur pawh a chiang tawh. 

Canadian singer Justin Bieber leh American model Hailey Baldwin te chuan March 1 khian 'Tiam tlat e' an ti leh dawn tih an puang a, he hunah hi chuan an 

ṭhiante pawh an tel tawh dawn. An inneihna hmun tur pawh tihchian a ni tawh a, Los Angeles khawpuiah an inkutsuih dawn a ni. 

Canadian chhuanvawr Justin Bieber hi March 1, 1994-a piang a ni a, kuminah kum 25 a tling ve tawh dawn. Hei hi remchangah lain, March 1 chu a nupui duhtak Hailey nena an inkutsuih nawn lehna ni atan ruat a ni ta a ni. 

A tirah chuan East Coast leh Canada-ah inneih hi buatsaih an tum a, amaherawh chu khaw awm danin a zir loh avangin Los Angeles  lam an hawi ta zawk a ni. An inneih leh turah hian an ṭhian te pawh an sawm kim viau dawn a nih hmel a, Kylie Jenner leh Travis Scott te pawh sawmna dawng tawh zingah an tel. 

Kum 24 Justin Bieber leh Hailey Baldwin (22) te hi nikum July 9 khan an inhual a, innei zui mai tur anga sawi an ni. Hei hi a thleng dik ta ngei bawk a, amaherawh chu a ruk thei ang berin an buatsaih thung. 

September thla tir lam khan New York City-a Marriage License Courthouse-ah an kal dun hmuh an ni a, inneih phalna an la nia tarlan a ni. Canadian singer JB-a phei hi chu a phur hle a, Marriage License an neih hnu hian a mittui a tla hial niin an sawi. 

Marriage License hi pek­chhuah aṭanga ni 60 chhung a dam niin khawthlang media te chuan an tarlang a, chu mi a nih chuan September 14 leh November 13 inkarah vel khan an innei tihna a ni. 

Canadian pop star Justin Bieber leh American model Hailey Baldwin hi an innei nia sawi awm fo mah se finfiahna tak a awm loh avangin hun eng emaw chen chu thuchiang hriat a ni lo. Hun rei tak chhung an ngawihbopui hnuah Justin Bieber chuan November 22, 'Thanksgiving' niin an inneih thu hi a puang chiang ta a ni. Hailey Baldwin pawhin a hming tawpah 'Bieber' a telh tak avangin  engkim a rawn nemnghet ta a ni.