Isua Krista ringtu Papa Roach frontman
U.K. Kerrang magazine-in Papa Roach rock band frontman Jacoby Shaddix a kawmnaah Shaddix chuan, "Kristian tam takten ngaihdan hrang nei ṭhin mah se Isua Krista zui hi ka hringnunah chuan a pawimawh a ni," tiin, Isua Krista a rin thu a sawichhuak.
Shaddix chuan, "Ka huna harsatna tam tak chu Isua ka rin avang chauhin ka paltlang thei a ni. Kristian tam tak he khawvelah hian an awm a, chung zinga ṭhenkhatte chu rindan dik lo nei leh a hlauhawm zawnga kal an ni. Mahse rinna keimahah a thawh tak tak chuan thiltihtheihna nasa tak nei ang maiin ka inngai ṭhin a ni," tiin a sawi.
Kum 1993 aṭang khan Shaddix hi Papa Roach lead singer a ni tawh a, 2014-a California khua Sacramento hmuna Capital Christian Church-a Easter service an neihnaah khan a ṭumkhatna atan Isua nena an inlaichinna a sawi chhuak tawh a ni. Kum 2013 aṭang khan Isua ringtu a ni ṭan tih sawiin, mipat hmeichhiatna, ruihhlo leh a kaihhnawihte chu a bansan vek thu a sawi bawk.
Shaddix hi khawvel lamah a tlan ve nasa ṭhin. Isua a Lal leh Chandamtua a pawm tirh khan awm dan a thiam lo a, Isua hian thil a ti thei a ni tih zawng a hriat thu a sawi. "Keimah chuan ka harsatnate hi ka hneh zo lo a, ka kehchhia a ni. Thinlung taka ka ṭawngṭaina chu Lalpa chuan lo hriain, Lalpa chu ka hnenah lo kalin min rawn chhandam ta a ni." tiin interview a neihnaah hian Shaddix chuan Pathian khawngaih chhandamna a chan dan a sawi a ni.