Kangana Ranaut leh Angelina Jolie khaikhin

'Dhaakad' film thar turah Indian actress Kangana Ranaut a chang dawn a, he film-a a chandan tur leh 2001 kuma Tomb Rider film-a Angelina Jolie chandan a inan hmel em avangin khaikhin dun an ni.     

Indian daily newspaper Mid-Day-in Kangana Ranaut an kawmnaah, Kangana chuan, "Dhaakad film tihchhuah thar tur hi Resident Evil  lam hawi a ni a, chem hmanga inbeihna tam tak a awm dawn a, hmelmate beihnan machine gun leh hmanrua hrang hrang ka hmang dawn a ni," a ti.    

He film director Razneesh Razy Ghai chuan Kangana-i chem vai dan turte, silai hman dan turte leh thil dang dang zirtir turin Thailand aṭangin stunt director an chah thu a sawi. Shooting tam zawk chu Thailand-ah an nei a ni.

'Dhaakad' hi nakkum Diwali ah an tlangzarh dawn a, diwali hi Hindu hoin thim chu engin a hnehna a nih thu an sawi fo ṭhin a, he film nen pawh hian a inhmeh viau dawn a ni. A teaser pawh August 8 khan YouTube lama en theih tura chhawp chhuah a ni tawh bawk.