Chance the Rapper-a'n Isua zirtirna ngaipawimawh

Grammy Award pawh lo dawng tawh Chance the Rapper tia kan hriat lar chuan, "Isua Krista hi khawtlang tana ṭhahnem ngai taka thawh theih nan leh midangte ṭanpui thei tura ka nuna phurna min petu a ni," tiin Ellen DeGeneres Show-a a interview-naah a sawi.

American rapper Chance the Rapper hi a hming tak chu Chancelor Jonathan Bennett a ni a, kar hmasaa Ellen DeGeneres Show-a interview a neihnaah, khawtlang tana i inpekna chhan hi eng nge tiin Ellen-i chuan a zawt a, "Isua chuan kan thisen zawmpuite kher lo, kan mihring puite leh ṭhenawm khawvengte hmangaih turin min zirtir a, a chhan chu mihringte vek kan nih vangin a ni. He Isua zirtirna hi ka lo puitling telh telh a, ka hre thiam cho telh telh a ni," tiin a chhang.

"Ka naupan lai aṭang tawhin ka nu leh pate hian khawlaia ṭanpui ngai i hmuhin kal pel nghal mai ṭhin lo la. I kal pel emaw kalsan hmain emaw i theihna laiah ṭanpui i tum ṭhin tur a ni, tiin min fuih ṭhin a ni. Chuvang chuan khawtlang tan leh midangte ṭanpuina atan ke ka pen chhuah ve theihna chhan hi ka nu leh pate leh Isua vang a ni." tiin interview-ah hian a sawi bawk.

'Thil tam tak ka hriatthiamna chhan chu Isua vang a ni' tia sawitu Chance hi music lamah hriat hlawh tak ni mah se, khawtlang tana mi ṭangkai tak a ni tel. 2015 khan Get Schooled Program kaltlangin Chicago Public School-te tan $100,000  a lo pe tawh a. Heng bakah hian nikum nipui lai khan, an khua Chicago-a school awmte'n arts lama hma an sawn theihnan, Public School Foundation-ah $ mtd 1 cheque a lo hlan tawh bawk a ni.