Projectpraise-ten English album tlangzarh

Projectpraise English Gospel video album chu Inrinni khan K. Lalrinliana, Food, Civil Supplies & Consumer Affairs minister chuan a tlangzarh.

Tlangzarh inkhawm hi MC. Cabe Hall, Aizawl Club-ah neih niin, Minister K. Lalrinliana hi khual lian a ni nghal. An album hming pawh hi 'Project Praise' tih a ni nghal.

Projectpraise-te hi Roman Catholic ṭhalai intelkhawm an ni a, Johnny K. Ruangmei, Nagaland Home Department OSD  hnen aṭanga project an hmuh aṭangin 'Project Praise' album hi an buatsaih a ni. 

Tlangzarh inkhawm hi Rini Hlondo chuan host-in, Rev. Fr James Zodinliana'n hunserh a hmang a, Amanga Francis Sailo, 'Project Praise' buaipuitu ber chuan lawmna thu a sawi bawk.

'Project Praise' hi 'praise and worship' album a ni a, hla 11 awmin heng zinga hla pakua hi Amanga Francis Sailo phuah hi a ni a, a dang pahnih hi chu sap hla awmsa a ni thung. He album-ah hian Cathedral zaipawl leh St. Andrew's Parish zaipawl-ten an pui bawk a, hla ṭhenkhat hi chu Mizo hla aṭanga Sap hla lehlinte a awm.

Video hi RDS Shots kutchhuak niin, recording hi Kings & Prophets studio-ah an tih a ni bawk.