HONTRADE INTERNATIONAL ṬHAZUAL LENGZEM-ah Fela Colney 'Tunlai Nula' a tunlai ber

Hontrade International Ṭha­zual Lengzem chart-ah No. 1 hauhtu thar an awm a, chu chu Fela Colney 'Tunlai Nula' a ni. KR Robert 'Hello' chu pahnihna niin Jonathan Lalengzauva 'I tan ka hmangaihna' chu pathumna a ni bawk.

Zonet Ṭhazual-a 'Sensiari' pakhatna a nihpui hnuah a reh vang vang a, kum khat dawn hnuah music video thar 'Tunlai Nula' a tichhuak leh a, a hit nghal hle.

He hla hi TV lama mipui thlir theiha a chhawpchhuah hnu lawk aṭangin Ṭhazual chart luahlumtu a ni nghal. YouTube lamah phei chuan kar hnih awrh chauh dahchhuah a la ni, chuti chung chuan Ṭhazual-ah roreltu a ni der tawh a, 'Tunlai Nula' hi tunlai miten nalh kan ti hle tih a chiang.

Chart-a hma a sawn dan pawh hi ngaihnawm tak a ni. Chart-a a rawn inlan tirh khan pasarihna a rawn ni nghal a, a lehpekah pathumnaah invawrh nghal dawrhin tunah chuan pakhatna dinhmun hial a rawn hauh ta a ni. Video hmuhnawm tak hi Ishot blank kutchhuak a ni a, Foster Studio-ah recording tih niin, music hi Hruaia CZ siam sak a ni thung.

'Tunlai Nula' hi VL Awia phuah a ni a, tunlai ṭawngkam takin a hla hi a 'catchy' em em a, video a hmuhnawm bawk nen, a satuin a sa thiam bawk a, chart-a hmasawn chak ber zinga mi a ni pawh hi a mak lo a ni.

KR Robert hla 'Hello' pawh pangana aṭangin pahnihnaah a rawn invawrh bawk a, mipui duhzawng a ni tih a hriat. He hla pawh hi chart luahlum tu a ni rei tawh hle a, hma a sawn zel leh nghal a, dinhmun sang bera din theihna 'chance' a nei ṭha hle a ni.

Jonathan Lalengzauva 'I tan ka hmangaihna' chu parukna aṭangin pathumnaah a rawn invawrh bawk. Palinaah hian pakhatna pawh lo ni tawh HT Lalthanzami  'Di rialin' chu awmin Dj Lalvenhimi hla thar 'Khuarei an' chu pangana a ni bawk.