Ticos-a music video thar 'Lunghlu'
Mizo Idol star Ticos Darhmingliana chuan Thawhṭanni zan khan music video thar a tichhuak.
Ticos-a hla thar hi 'Lunghlu' tih a ni a, a official music video palina a ni. Matlana Chhakchhuak phuah niin, a satu aw nen pawh hian a inmil hle a, music video pawh a hmuhnawm hle.
'Lungmawl duhsam' tih hla hmanga Zoram dung leh vang deng chhuak thei Ticos-a hi a zaithiam zia sawi nawn a ngai lo a, a music video-te pawh belhchian dawl tak tak an ni hlawm. Tun ṭumah hian classic deuh takin a rawn inlar a, 80's hunlaiah min hruai kir a ni ber mai.
80's-ah kir ang aw!
1980's hunlai vel ang turin video hi siam a ni a, a lang hlui raih a, 80's chhoa Hollywood Film-te nen pawh a inzul viau. Audio pawh a classic raih mai.
Audio recording hi 80's bawr ang thei tura siam a ni hrim hrim a, hei hi a tihlutu tak pawh a ni. Music hi he hla phuahtu Matlana Chhakchhuak leh Hmachhuana Khiangte te kutchhuak a ni a, mixing hi Hope Music buaipui a ni thung. Video director hi Remruata (Bilywaif) a ni a, en manhla tak a ni.
Ticos Darhmingliana hian Mizo Idol intihsiak a zawh hnu khan music video lam a buaipui chho nghal a, tunah chuan pali lai a puitlin ta a ni.