Mystical Mizoram Ṭhazual Lengzem-ah

Mystical Mizoram Ṭhazual Lengzem chart-ah Jaui pakhatna a ni. A hla hit 'I Hlutna' hmangin chart-ah ro a rel. Essy ft JT Production 'Min ui lo mi' chu pahnihna a ni a, Ngurthansanga 'Chalmar zai' chu pathumna a ni.

Ṭhazual lengzem chart lairil fan zotu, a thinlai luah phu ber chu tun dinhmunah chuan Jaui a ni. A hla hit 'I Hlutna' hmangin chart thinlairil ber a luah a, chart lehah a la luah chhunzawm zel dawn em tih hriat a chakawm tawh hle.

Zonet Ṭhazual award 2020-a Best Female Artist Lengzem award dawngtu Jaui hian 'I Hlutna' music video hi nikum October thla laihawl velah khan a tichhuak a, music video hmuhnawm tak, a hla nena inmil takin a siam a ni. Hope Music kut chhuak hla hi Jaui hian a sa thiam hle a, nikum kum tawp lamah phei chuan lengzem hla lar ber zinga mi tih loh rual a ni lo.

Music video a siam hma hian nikum August thla tirah khan lyrics video a tichhuak hmasa a, miin mawi an ti hle a, music video-a siam tura ngentu an awm nual avangin a siam ta tih Vanglaini a lo hrilh tawh a, a tisual lo. Tunah chuan a music video ringawt pawh hi maktaduai chuangin an thlir tawh, lyrics video nuai nga chuangin an thlirin an ngaithla tawh bawk.

Jaui hian a hlate hi Spotify lamah a dah deuh vek tawh a, lenvah emaw lirthei khalh pah emawa ngaithla duh tan awlsam takin a hmeh chhuah theih reng a ni.

A mal ve ve pawha an zaithiam vanga Zoram mipuiin kan hriat Essy leh JT Production-te hla 'Min ui lo mi' chu chart-ah pahnihna a ni a, pakhatna dinhmun pawh an la hauh thuai a rinawm. An dinhmun a ṭha sawt hle.

Essy leh JT-a te hian he hla hi nikum October thla tawp lamah khan music video hmuhnawm tak nen an tichhuak a, YouTube lamah thlirtu nuai nga chuang an awm tawh. Ṭhazual award 2020-ah pawh Best duo/group lengzem award an lo lakpui tawh bawk a ni.

Ngurthansanga 'Chalmar zai' chu pathumna a ni a, Rachel Lalnunkimi 'Di ṭhen lunglen' chu palina niin Zorinzuali Khiangte 'O' chu top 5 khartu a ni. Ṭhazual chart top 10-ah hian Rebecca Lallawmsangi, Keimah Senes, Tlangval Tlumtea ft. Lil Me, Mabiaki Pachuau, Nathaela leh Rempuii-te pawh an lang.