Victoria Beckham-i'n A fate hriatah chaw nghei ngai lo

Spice Girls band member hlui, fashion designer ni ta Victoria Beckham chuan Glamour UK-in a kawmnaah a pasal, footballer hlui David Beckham nena an fate pali an enkawl dan leh, nu leh pa mawhphurhnate a sawi. 

Victoria chuan an nupain an fate tana entawn tlaka awm an tum thu sawiin, insawizawi leh thil hrisel ei a pawimawh zia pawh a hre chho zel tih a sawi. Naupangte chuan an thiltih engkim chu an hre ve vek tih sawiin, hrisel taka awm leh hlim taka awm a pawimawh zia hriattir a pawimawh thu a sawi. A hunbi taka thil ei a pawimawh thute sawiin, a fate hmuh leh hriat turin chaw pawh a nghei ngai loh thu a sawi bawk. 

An nupa chuan an fate an pawh ṭha hle tih sawiin, an theih anga inpawh leh venhim chu an tum a, chak taka awm a, mi ṭha leh zahawm taka siam an pawimawh thu a sawi. Hei bakah hian a nuna thil a lo tawn hrang hrangte chu a fate zirtirna atana a hman ṭhin thu leh, a bikin an fa tê ber leh hmeichhe awmchhun Harper chu a zirtir nasat thu a sawi. 

Victoria chuan school a kal laiin tihnawmnah a tawk ve fo tih sawiin, hei vang hian hmeichhe naupangte pawh midangte laka awmdan leh, midang chunga ṭhat chhuah dan zirtir a pawimawh thu a sawi. A thil tawn ang chu a fanuin a tawn ve emaw, mi chunga a tih ve emaw duh loh thu a sawi a ni. 

Victoria leh David Beckham-te hi kum 1999 khan inneiin fa pali - Brooklyn Beckham, Romeo James Beckham,  Cruz Beckham leh Harper Seven Beckham te an nei.