Rihanna-i'n Sony/ATV-ah Jon Platt thawhpui

April thlaa American music executive Jon Platt-a Sony/ATV chairman/CEO a nih hnuah milarte zinga Sony/ATV thawhpui hmasa ber chu Rihanna a ni.

'Barbadian' singer Rihanna leh American music publisher Sony/ATV-te chuan thawh dunna thuthlung Thawhṭanni khan an ziak. Rihanna hla ziah zawng zawngte bakah, a hla thar turte pawh he thawhdunna tura inremnaah hian a tel. 

An thawndunnaah hian Billboard Hot 100-a Rihanna top 10 hla ho a tel a, 'Love on the Brain', 'Needed Me,','Rude Boy' leh Drake nena an hla hit 'Work'-te pawh a tel bawk. Rihanna hian a hmain American mu­sic publisher Warner Chappell nen thawhdunna an lo ziak tawh a. Platt hi Warner Chappell-ah hian 2015 aṭang 2018 thleng a thawk. 

Platt chuan Rihanna-i'n Sony/ATV nena thawhdunna tur inremna a ziahpui thei chu lawmawm a tih thu a sawi a, Rihanna nen thawhdun chu chawimawina a nih thu a sawi bawk. Nikuma N.E.R.D. nen an zai dunna hla 'Lemon' hnuah Rihanna hian hla a ti chhuak leh tawh lo. Sony/ATV nen an thawhdun tak hnuah chuan a fan-te tan Rihanna hnen aṭangin hla thar a beiseiawm hle ang.

Rihanna hian music lamah chauh ni lo, sumdawnna lam pawh a buaipui tel a, midangte ṭanpui hna thawk ṭhintu a ni. Kar liam ta khan a vawi hnih nan New York Fashion Week-ah Rihanna company 'Savage X Fenty' lingerie line model-te chuan show an nei a, he hunah hian DJ Khaled leh Migos-te chuan mi­pui pungkhawm an awi.