TBC-a hla thar 'Ka Innghahna' zaninah

TBC Zaithanpuia chuan a hla thar 'Ka Innghahna' chu zanin dar 8-ah hian a YouTube channel 'TBC Zaithanpuia Official'-ah mipui en theih turin a chhawpchhuak dawn.

'Ka Innghahna' hi July 13, 2016-ah daih tawh khan TBC-a hian a phuah tawh a, a testimony aṭang leh midang testimony a ngaihthlak aṭanga a phuah chhuah a ni a, a music video-ah pawh hian mi chi hrang hrang leh dinhmun inang lo tak takte an lang dawn tih TBC-a hian Vanglaini a hrilh. Hei hi chan chawp mai ni loin, a taka thil awmdan a nih thu a sawi bawk.

'Ka innghahna'  hian a tar­lan tum ber chu, eng ang mi pawh ni ila, eng ang dinhmunah pawh ding ila, he lei ah hian Krista lo chu innghahna tlak a awm chuang lo tih hi a ni. Mihring nunah hian engpawh a thleng thei a, hlim ni leh lawm ni, beidawn nite a lo thleng ṭhin. Chung zawng zawngah chuan mihringa innghat loa Pathiana innghah tlat a pawimawhzia tarlanna hla ṭha tak a ni a bawk.

Video hi Gabriel Graphic Muantea kutchhuak niin, Music leh Audio hi Larry-a  Gosen Recording Studio a ni. "Pathian avanga he video hlawhtlin theih nana min puitu zawng zawngte an zavaia chungah Pathian hmingin lawmthu ka sawi mawlh mawlh a ni. Pathian ropui nan chauh he hla leh video hi ka duh takzet a ni," tiin TBC-a sawi.