Zanin Zonet-ah Remthanga

Zanin dar 8:30 hian Zonet Zawlbukah LBS In-House Show en tur a awm leh dawn a, a lemchan thiam vanga hriat hlawh K. Lalrem­thanga hmuh tur a awm dawn. Show-ah hian tunlaia chhuak mek Zonet Original TV Series “0389” changtute an inlan dawn bawk.

Hmangaihna Mittui, Hmangaih­na Pasalṭha leh Di loh D film aṭanga hriat hlawh K. Lalremthanga (U Remthanga) hi a vanglai chuan Mizo film star zingah ani aia boruak nei lian an awm chuang lo a, tun hnua scoial media kan hman lar hnuah 'Mizo Legend' tia sawi ṭhin a ni.

Mizo film Star Rem­thanga chuan, "Legend tih hi, ka inti hran lo. Mahse, ka film ngaisang leh min hlutsak tu ten min tihna hi ka pawm mai," a ti! A bak chanchin ngaihnawm dang chu zan­in Zonet Zawlbuk lam­ah ngaihchan theih a ni ang.

Mizo ten TV-ah hmuh­­nawm en kan duh a, chhungkuaa en tlak kan zawng. Zonet chuan mipui mamawh chhanna a nih beiseiin TV Series “0389” a ti chhuak a, tluang taka chhuah mek zel a ni.

0389 buaipuitu zinga pakhat Raymond chuan, "Mizo hian theihna kan nei sang, keini aia thiam pawh an awm ang. Midang cho chhuahna a nih beiseia hma la kan ni," a ti. Kumin February thla aṭang khan shooting an nei a, season khatnaah hian episode 12 a awm ang.

Mizo YouTuber hriat hlawh Drew Pachuau kaihhruaina hnuaia neih LBS In-House Show hi thla tin vawi khat neih ṭhin a ni, nikum khan season 1 neih ni tawhin show vawi 10 an nei; season hnihna kal mekah tun ṭum hi show parukna tur a ni dawn. Show hnuhnung berah khan Mizo Idol judge hlui Mimi Renthlei nen hun an hmang.

Drew Pachuau chuan, "Kan show-ah hian milar, zaithiam leh filmstar bakah a hun laia thil thleng langsar kan ti ṭhin. Inkawmna bakah games khelh ṭhin a ni a. Tun thlenga min hlutsak a, min lo thlirsak ṭhinte chungah lawmthu kan sawi," tiin Vanglaini a hrilh.