Siampuii Ralte ft Jt Production 'Ka Hmangaihtê' zaninah aw

Tunlai zaithiam rawn lar thar zinga duhawm ber pawl Siampuii Ralte zai hi chu YouTube lamah i lo ngaithla fo tawhin a rinawm. Jt Production phei hi chu inhmelhriat nawn tir a ngai tawh lo. Tunlai Mizo mipa zai­thiam zingah chuan huhang ngah ber pawl a ni. 

The Friday Show channel lamah nikum kum tawp dawn lamah khan anni pahnih hi an lo inlan dun tawh a, Jt-a leh JC. Mawitea (The Friday Show)-te hian Siampuii hi surprise-in kha show-ah khan thawhdun chung­changte kha fiamthu deuhreuh khan an sawi a, mahse chu an thusawi chu zaninah hian a takin an rawn puitlin dawn ta.

Jt Production leh Siampuii te hian zanin hian an thawhdunna hla hmasa ber 'Ka Hmangaihtê' chu Zonet-ah an tichhuak dawn. Hei hi Valentine's Day pual a ni. "He hla hi nikum kum tâwp lam (November thla) vela kan peih fel tawh a ni a. Amaherawhchu, hun ṭha zawk kan nghah avangin tunah kan tichhuak thei dawn chauh. 

"Siampui nena kan thawh dun dan hi, JC. Mawitea (The Friday Show) kaltlangin a nia, show pakhat a buat­saihah Siampuii hi kan surprise a; tah chuan zaithiam ka tiin thawhpui ka chak thu ka sawi a ni. Chuta ṭang chuan tun dinhmun hi kan thleng a ni,"tiin he hla phuahtu Jt Production chuan Siampuii nena an thawhdun dan kalkawng hi Vanglaini a hrilh.

Mihring inkara hmangaihna lam hla a ni dawn a, mipa emaw hmeichhiain emaw kha a mi hmangaih hnena a hmangaih zia a sawifiahna leh hrilhna lam hla a nih thu a sawi bawk. Zanina Zonet lama tihchhuah a nih dawn bakah hian Valentine's Day ni taka a duh apiangin an ngaihthlak hman theihna turin February 10 hian YouTube lamah dah a ni bawk ang.