Box Office: The Upside ngam loh 'Glass'

Kumin chu Box Office-ah roreltu an inthlak sek dawn a nih hmel a, January thla ringawtah pawh an inlehthal zak zak mai. Kar hmasa lama No.1 hauhtu The Upside chu tun hnaia film chhuak thar, Glass chuan $mtd 40 zet lalutin a rawn khum ve leh a ni. 

The Upside hian $mtd 15 lalutin pahnihna a la hauh tho a, Aquaman chu pathumna-ah a tla thla ve bawk. 

Scottish actor James McAvoy channa Glass hi January 18 khan tlangzarh a ni a, tun weekend chhung ringawt khan $mtd 40 zet a lalut a ni. He drama/fantasy film hi tun hnaia film chhuak thar zingah chuan thawm nei lian berte zinga mi niin, hralh pawh a kal hle. 

James McAvoy leh English-Argentine actress Anya Taylor-Joy-te channa a nih miau avangin dahniam teih a ni lo va, American film star Bruce Willis leh Sarah Paulson-te an la awm cheu bawk. He film siam nana an budget hi $mtd 20 vel a ni a, ni thum chhung lekin an senso hi an hmuchhuak nghal der a ni. 

American comedian Kevin Hart leh Australian actress Nicole Kidman-te channa The Upside hian kar hmasa khan Box Office-ah dinhmun sangber a luah a, a sum lakluh pawh $19.6 lai a tling. Tun weekend-ah erawh beisei angin a che ṭha tawk lo a, $mtd 15 lalutin pahnihna a ni. 

Aquaman chuan $mtd 10 lalutin top 3-ah a lang a, Dragon Ball Super : Broly leh Spider-Man: Into The Spider-Verse-ten an dawt. Nikum December-a tlangzarh Spider-Man: Into The Spider-Verse pawhin beisei a phak lo zui zel a, kar liamta chhung khan $mtd 7.5 chauh a thawk chhuak a ni. Box Office aṭanga a sum lakluh tawh zawng zawng pawh $mtd 303.1 niin, thawm a neih len ang huin sum lakluh kawngah a che ṭawk lo.  

Sum lalut hnem zual zingah hian - A Dog's Way Home, Escape Room, Mary Poppins Returns leh Bumblebee-te an lang a, On the Basis of Sex chuan $mtd 3.8 a lalutin top 10-ah a lang ve leh bawk.