World Cosplay Summit 2019 India aiawhtu tur Mizo

Khawvel huap Cosplay khawmpui lian, World Cosplay Summit (WCS) chu August thla khian Japan-ah neih a ni leh dawn a, he hunah hian India aiawhin Mizo pahnih - Reuben Zorindika leh Dominic Khiangte-te an tel dawn. 

WCS-a tel tur thlanna hi uluk taka kalpui ṭhin a ni a, India ramah pawh hmun hrang hrangah mumal taka kalpui a ni. Mizoramah pawh nikum khan YonKoCosplay Fest 2018 buatsaih a ni a, hei hi WCS-a tel tur rahbi pawimawh hmasa a ni. 

YonKoCosplay Fest-a pakhatnate hian India aiawha tur thlanna, Nagaland khawpui Dimapur-ah intihsiak an hmachhawn a ni. 

Hetah hian Reuben Zorindika leh Dominic Khiangte-te hi telin, Japan-a neih tur World Cosplay Summit-ah India ai an awh dawn ta a ni. 

World Cosplay Summit hi kum 2003 aṭang khan neih ṭan a ni a, hlut pawh a hlawh sawt hle. Japan chuan he summit hi a thleng ṭhin a, khawvel ram hrang hrang ṭangin an fuankhawm ṭhin a ni.