Downtown Abbey-in sum a lalut tam ber Beisei phak lo Rambo

Box Office-ah film tharten hma kan lo hruai ve tawh ange an ti niawm takin sum lalut tam pathum chu film thar an ni ṭhawt mai. Hmahruaitu hi boruak nei lian em em lo Downton Abbey a ni daih a, pahnihnaah Ad Ashtra awmin, Rambo: Last Blood chu pathumnaah a awm ve pha ṭawk.

Downton Abbey chu 

British historical period drama film, Julian Fellowes ziah chu beisei loh tak maiin Box Office-a roreltu a rawn ni a, kar tawpah khan theatre 3,079-ah chhuah niin sum $31,033,665 zet a lalut. Downton Abbey hi Julian Fellowes ziah tho a series pawha siam a ni a, September 2010 aṭang khan a series hi chu chhuah ṭan a ni. Tuna chart-a hmahruaitu hi chu a movie niin, 1927-a thil thleng anga chan chhuah a ni. Yorkshire coutryside-a Crawley chhungkua British lal nupain an tlawhna, lalte thah tumtu rawn inlan tih vel a ni a, a hmuhnawm dang­dai hle dawn tih a hriat theih.

Minute 122 leka sei niin, film siamna atan hian $mtd13-20 vel an hman laiin khawvel puma a sum lakluh tawh erawh $mtd72.2 a tling tawh thung.

Brad Pitt, Tommy Lee Jones leh Liv Tyler-te channa Ame­rican science fiction adventure film Ad Ashtra hi sc-fi lam tuipui tan chuan hmaih phal chi a ni lo ang. Starring-te an hrawl a, van thengrenga inkahchhuah lam tuipui tan chuan a hmuhnawm dawn tih a chiang sa. 

A film siamna atan hian $mtd 80-100 inkar zet hmang anga chhut ni mah se khawvel puma a sum lakluh tawh hi $mtd 45.2 chiah a la ni thung a, sum lakuh kawngah erawh beisei a phak lo deuh niin a lang.

Mizo zingah pawh hian Rambo hre lo chu kan tlem viau awm e. Rambo tih hming lamrik rualin kan mitthlaah Sil­vester Stallone mengrum lai leh a lu hreng lai a lang nghal ṭhin kha a ni a, tlangzarh a nih dawn khan mi tam tak chuan Box Office-a No.1 turah an ngai ang tih a rinawm.

Rambo film pangana hian thea­tre 3,618 aṭangin sum $18,872,919 chiah a lalut phak a, a aia sum lalut tam pahnih an awm! Chu a chhapah sawiseltu an tam hle a, Rambo film hmasa siamnaa lo inhnamhnawih tawhte pawh sawiseltu zingah hian an awm nawk a ni. 

Rambo lehkhabu ziak tu David Morrell chuan  "Rambo: Last Blood"-in a tihlungawi loh thu a sawi. David Morrell chuan "He film thar ka en zawh hnua theatre ka chhuansan rualin, he film hian min ti hnual nghal a, he film avang hian ka hlutna leh zahawmna a tlahniam sawtin ka hria," tiin a sawi a ni. Rambo tihchhuah hnuhnung berah hian David Morrell hi producer tura sawm a ni lo. 

Box office-a mi tam tak lo hrankhum tawhtu It: Chapter two chu palinaah a awm a, chart hmasa thleng kha chuan pakhatna a la ni phak. Chart hmasaa pahnihna Husters chu sum lalut tam pangana a ni bawk.