Emmy Awards thlirtu tlahniam

Thawhṭanni zinga 71st Emmy Awards sem chu TV lama thlirtu an tlahniam hle a, viewer hi maktaduai 6.9 niin nikum aiin thlirtu hi 32% zetin an tlem. Show thlirtu an tlem ber ṭum a la ni.  

Nikuma Emmy Awards kha NBC in pein,  'SNL : Weekend Update' anchor Colin Jost leh Michael Che ten an host a, kuminah erawh host an awm lo a, Fox in a pechhuak thung. He event tihchhuahna tur hian Television Academy chuan broadcast rights fee atan kum khatah dollar maktaduai 9 vel a dawng a, hetichung hian viewer hi a zawnin kum hnih chu an tlahniam tawh a ni.

TV viewer an tlakhniamna chhan hi streaming service - Netflix, Amazon leh Hulu ten TV audience tam tak an lakpen tak vang nia ngaih a ni. Streaming service te an len chhoh hma,  kum 2013 ah kha chuan Emmy Awards hian TV aṭangin thlirtu maktaduai 17.8 zet a nei a ni.