Prince Harry-a'n a nu hming chawi damdawi-in hawng dawn

Africa rama Princess Diana hming chawia sak damdawi-in chu Diana-i fapa Prince Harry chuan Zirtawpni hian a hawng dawn.

Prince Harry-te chhungkua hian Angola hmuna Huambo Orthopedic Centre an tlawh dawn a, helai hmun hi kum 1997 khan Lady Diana khan a lo tlawh tawh a ni.

Huambo Orthopedic Centre hi Princess Diana chawimawna atan  Zirtawpnia hawn ṭhat leh tur a ni a, Prince Harry hian a hawng ang.

Prince Harry private secretary Samantha Cohen chuan Huambo Orthopedic Centre hmun hi Princess Diana chuan kum 1997 khan a lo tlawh tawh thu sawiin, helai hmua chengte tan hian an nunkhaw nawmna turin 'awareness' a lo neih tawh thu a sawi bawk.

Kum 1997 khan Diana khan Huambo hmuna lungalhthei laihnaa inhliamte ṭanpuina hna Halo Trust charity kaltlangin a thawk a, an harsatnate hriatthiam pui turin a hmunah ngei amah kha a kal a ni. A hmalakna avang hian a kumleh lawkah ram 40 telna,  "Anti-Personnel Mine Ban Convention" neih zui a ni ta bawk.   

Duke and Duchess of Sussex-te hian fapa thla li mi Archie hruaiin Africa ramah royal tour an nei mek a, September 23 khan South Africa thlengin October 2-ah an ram an pan leh ang.