Diplo-a'n Jonas Brothers' Instagram account a hack!

American DJ lar Diplo chuan Nilaini khan Jonas Bro­thers' Instagram account a 'hack' sak a, engtin nge a hack theih tih chu la sawi chhuak lo mah se boruak erawh a siam hle.

Diplo hi a fiamthu a sang ve hle niin a lang, Jonas Brothers'-in an follow zawng zawng a unfollow vek phawt a, amah chiah a in follow tir. Chumi hnuah profile picture thlakin a thlalak a hmang a, Instagram story-te a la upload deuh deuh.

A la duhtawk mai lo, thlalak eng emaw zat a la post zui. Kawr ha loa a thlalak, Calvin Klein kekawrte ha chunga a thlalakte a upload. Chumai a la ni lo, 90's chhoa lar ṭhin unau zaithiam Hanson thlalak post-in "Jonas brothers diktak theihnghilh ngai suh u" tiin caption a la siam bawk. A la duhtawk lo cheu! kawr haloa a thlalak, Grammy award pathum a pawmna thlalak a la upload bawk a ni. Nimin pawh khan a thil post-te hi paih a la ni lo a, hmuhtheihin a la awm bawk.

Instgram story a upload ho phei chu a nuihzathlak hle a, Jonas Brother's-te na taka fiamin an thlalak nuihzatthlak tak takte a post a ni. Jonas Brothers'-te account hack a ni tih fan-ten an hriat hnu lawk hian social media lamah pawh titi a tam zui nghal hle a, mi ṭhenkhat chuan Jonas Brothers' Instagram chu hack a ni nge, Diplo an ngaina lutuk zawk titen an sawi nasa hle.

Jonas Brother's chuan Twit­ter lamah chuti em ema Diplo an ngainat loh thute post-in 'lol' tihte an ṭawngkamah an hmang tel a, a tirah chuan an thinrim em em hran lo a ni mai thei.

Joe Jonas chuan a Instagram-ah a tirah chuan a nuihzatthlak a tih thu leh tuin nge password pe che? ti tein Diplo hi a zawt a ni. An comment chhunzawmnaah erawh an lawm vak lo niin a lang a, engtin nge thil a thlen zel dawn tih chu hriat chakawm tawh tak a ni.