PUMP-in ESOM pualin hun hmang

People United in Music with a Purpose (PUMP) chuan Ningani zan khan Ignite Studio-ah Ephatha Society of Mizoram (ESOM) pualin hun an hmang.

PUMP hian an lo tih fo tawh ṭhin angin Ningani zanah khan midang tan an theihna leh anmahni insengsoin hun an hmang leh a ni. He hunah hian zaithiam hrang hrangten zaiin hun an hmang a, in lam aṭanga TV kaltlanga lo thlirtute bakah a hmuna kalte pawhin programme an hman chhung hian ṭanpuina an pe reng bawk.

Zonet leh LPS chuan PUMP programme hi live-a pechhuakin, phone number an tarlan kaltlangin ṭanpuina pe duhten an pe a ni. Ṭanpuia la pe duh tan Zonet leh LPS office-ah, office hun chhungin a la pek theih reng bawk.

Ephatha Society of Mizoram (ESOM) hi 2012-a din kha niin, bengngawng ṭawngtheilote tana pawl din a ni.

A tirah chuan mumal takin an kal thei lo a, mahse 2013 khan Firms & Society-ah inziaklutin, mamawhtute tana school din chu a tum ber a ni. "Khawvel awm chhung chu ṭawng leh ri hriatna lama harsatna nei hi an la awm reng dawn si a, kan ram tan, kan tu leh fate tan tiin engmah bulṭanna nei loin kan din ve tawp mai a ni," tiin C. Thanzami, ESOM general secretary chuan Vanglaini a hrilh.

Tunah hian Ephatha Society hnuaiah hian member 30 awmin a duh apiang tan Rs. 500 pein member a nih theih reng bawk. May 2, 2016 khan ESOM hian a tum ang ngeiin 'Ephatha Special School' a din ta a, tunah hian Zirlai 14 neiin Class I-VII thleng zirlai an nei ve mek.

Vaivakawna Allan Lalmuan­puia building luahin thawktu mi paliin naupangte hi an enkawl a, thla tin Rs. 1000 chawi vein, hei hian thawktute hlawh pawh a phuhru pha lo. Pawisa lakluhna mumal tak an neih loh avangin mi inphalte hnen aṭanga pawisa an dawn aṭangin an kal ve mek zel a ni.