Kristiana Vanram Kawng Zawh film thar siam

King Street Pictures chuan Kristian film hmuhnawm tur tak, Mizote pawhin a kan hmelhriatsa, "Heavenquest: A Pilgrim's Progress,” chu September 24 khan a trailer an ti chhuak.

He film tihchhuah thar tur hi John Bunyan-a ziah Kristiana Vanram Kawng Zawh (The Pilgrim's Progress) lehkhabu zulzuia ziah a ni a, he lehkhabu hi 1678 khan a ziak a ni. Mizorama Kristiana Vanram Kawng Zawh tia kan hriat lar "The Pilgrim's Progress" lehkhabu hi khawvel ṭawng hrang hrang 200 chuanga lehlin a ni a, he lehkhabu hian  Kristan nundan tur leh 'Vanram' pana Kristian-te kaldan kawng a entir a ni. Mizo ṭawnga letlingtu chu Pastor Chuautera a ni.

Heavenquest: A Pilgrim's Progress director Matt Bilen chuan "Kum liam ta khan he lehkhabu hi ṭha ka tih em avangin, ka fapa pahnihte ka chhiar sak nghe nghe a ni," a ti. Kumin October 25-a neih tur 'HeavenQuest World Wide Digital Premiere Event' neih hunah darkar 48 chhung stream theih a ni dawn a, official erawh chuan nakkumah tlangzarh a ni ang. Kum 1978 khan 'Kristiana Vanram Kawng Zawh' tih film hi siam a lo ni tawh bawk.

South Korean actor Cha In-pyo leh model Ricky Kim, Mexican actress Karyme Lozano leh Fernanda Romero-te mai bakah, Australian actress Peta Sergeant leh American actor Alan Powell-te chu he film-a changtu langsar zualte an ni.