MDM Circle of Music Meet Million Viewer nei tling pasarih awm

Music Domain Mizoram (MDM) chuan kumtina an tih ṭhin  angin, Zirtawpni liam ta zanah khan a vawi kua nan Circle of Music Meet hlawhtling takin an hmang.

MDM Circle of Music Meet-ah hian Mizoram Youth  Commission Chair­man Dr. Vanlalṭanpuia chu khual lian niin, Sawmtea Chhangte leh Mawitei Ralte-ten an host a ni. He hun hmang tur hian Zoram hmun hrang hranga MDM member awmte an kalkhawm ṭha hle. Circle of Music Meet hi Mizoram Rural Bank sponsor niin, MRB hruaitute pawhin he hun hi an hmanpui a, WAVE sound & records-in Sound leh Light an tum ve bawk. 

Dr. Zothansanga, MM President chuan inlawmna thu sawiin, zaithiam eng emaw zat an zai a ni.

MDM Circle of Music Meet-ah hian MDM award hrang hrang sem niin, C. Dinthanga hnenah Lifetime Achievement  Award an hlan. MDM Artist of the year (Lengzem/ Lenglawng) award chu Kimkima hnenah hlan niin, Stacy VL Muanpuii hnenah MDM Artist of the year (Gospel) hlan a ni bawk. 

MDM New Artist of the year (Gospel) dawngtu chu 'Mawi tawp berin' tih hla thiam tak maia satu H.Lalremruati a ni a, MDM New Artist of the year (Lengzem/Lenglawng) chu Mizo Idol Star Ticos Darhmingthanga hnenah hlan a ni bawk. MDM group/ Duo of the year award chu Feli Fanai & Manuna-ten an dawng bawk a ni.

MDM hian tunah hian YouTube lamah subscriber nuai hnih chuang an nei tawh a, a pung mek zel bawk. YouTube leh Library royalty aṭangin sum cheng nuai 30 chuang zet an semchhuak tawh bawk. Circle of Music Meet-ah hian YouTube lama thlirtu maktaduai chuang neite hnenah lawmpuina an hlan nghal bawk a, 'Sarah, i zunzam' leh 'I zun ngaih lunglen vangin' tih hlate hmanga Zoram dengchhuaktu Kimkima'n thlirtu a ngah ber.

Kimkima hian 'Sarah, i zunzam' hmangin viewer mtd. 2.3 a nei tling tawh a, 'I zun ngaih lunglen vangin' chuan viewer mtd. 2.4 a nei tling tawh bawk. Hemi pahnih hmang hian viewer mtd 4 chuang a nei tawh a ni. Mizo Idol star Rachel Lalnunkimi chuan a hla hmangin viewer mtd 2.8 chuang nei tawhin hla pakhat hmanga thlirtu ngah ber a ni ve bawk.

Awmte Polymer pawhin a hla pahnih 'Thlasik rim' leh 'Kan dil bik lo' chu viewer maktaduai chuang a nei tling ve bawk a ni.

Rachel Lalnunkimi - mtd 2.8 (Mai a lum e) 

F. Zomuanpuia - mtd 1.4 (Satel lem)

Marina Vanhriatpuii Ralte - mtd 1.2 (Thlawitenâli) 

Josephine Lalawmpuii - mtd 1 (Khep khep maia)

Hlimhlimi    mtd 1.5 (Ṭhian rinawm)

Kimkima    mtd 2.3 (Sarah,i zunzam) - mtd 2.4  (I zun ngaih lunglen vangin)

Awmtea Polymer    mtd 2.5(Thlasik rim nam) - mtd 1.5 (Kan dil bik lo)