MCU-ah Spider-Man a kir leh
August thla khan Spider-Man fante tana thu dengkhawng tak hriat tur a awm, chu chu Disney leh Sony inrem theih lohna thu a ni. Company lian pahnih inkara inrem theih lohna avangin mi tam tak chuan ui tak chungin Marvel Cinematic Universe aṭanga Spider-Man an thlah liam a ṭul ta a nih kha.
Tunah erawh thuthar lawmawm tak Spider-Man fan-te tan hriat tur a awm leh ta a, Disney leh Sony chuan inremna, Tom Holland-a channa Sipder-Man film pathumna siam turin inremna an siam leh ta. Marvel Studios president Kevin Feige chuan MCU-a Spidey kan hmu leh tur chu lawmawm a tih thu sawiin, amah mai bakah Marvel Studios-a awmte zawng zawng chu an lawm hle tih a sawi. Feige hian Spider-Man film hmasa pahnihah khan nasa takin a tha a thawh a ni.
Company pahnihten inremna an siam leh thei ta hi Tom Holland pawh a lawm hle a, social media lamah a lawmzia a sawichhuak ve hial. Spider-Man film thar ltur hi a film hming tur tak tarlan la ni lo mah se 2021, July 16-a tihchhuah hman tum a ni a, Spider-Man: Homecoming leh Spider-Man: Far From Home hlawhtling taka lo produce tawhtu Amy Pascal bawk producer a ni leh ang.