#FarmersProtest Rihanna leh Greta Thunberg-te'n an thlawp

Sorkar laipuiin nikum kum tawp lama a pawm thar, Farm law thar pathum duh lohna lantirna loneitu pawl hrang hrangin an neih mek chu khawvel huap zaithiam Rihanna chuan a thlawp tih a twitter-ah a tarlang. Chumi hnu lawk chuan Swedish climate activist Greta Thunberg pawhin a rawn tarlang zui ve bawk.

American pop singer Rihanna chuan India ram huna Thawhlehni zanah khan Twitter-ah loneitute nawrh huaihawt vanga Delhi-a internet tihtawp a nih chungchang chu tweet-in a caption-ah 'why aren’t we talking about this?! #FarmersProtest' tih a hmang. Hei hian ngaihven a hlawh zui hle.

Rihanna tweet hi comment-tu an pung chak a, a bikin India miin an comment nasa. Nimin chawhnu lam thleng khan mi nuai hnih bawr velin an retweet der tawh. Climate activist Greta Thunberg chuan nimin zingah khan hemi chungchang hi tweet ve bawkin a caption-ah 'We stand in solidarity with the #FarmersProtest in India' tih a hmang ve bawk.

Rihanna leh Thunberg-te hian CNN-in Thawhṭannia an tarlan, loneitute leh police-te an innawr buai hnua New Delhi leh a chhehvela internet tihtawp chungchang chu an tweet a ni. Farm law thar duh lo hian nikum November 26 aṭang khan loneitu pawl hrang hrang chu Delhi ramriah an pungkhawm a, tractor rally-te buatsaihin sorkar laipui dan siam thar duh lohna hi an lantir a ni. Eptu party hrang hrang pawhin loneitute an thlawp thu hi an sawi lang tawh a,  US leh UK politician ṭhenkhat pawhin loneitute nawrh chungchangah hian thu an lo nei zeuh zeuh tawh bawk.

US vice-president Kamala Harris vahnu lawyer Meena Harris pawhin Internet shutdown chu a dem ngaih pawimawh a ṭul thu sawiin loneitute laka paramilitary tharum thawhna chu thinutthlak a tih thu a sawi. India sorkarin engtin nge a sawi

Ministry of External Affair chuan nimin khan thuchhuah siam nghalin,"Interest group ṭhenkhatin heng duh lohna lantir chungchanga an agenda an rawn auchhuahpuia a ni lo zawnga an rilru hruaikawi an tum hi a pawi kan ti," tiin an tarlang.

"Social media-a hashtag leh comment thin ṭhawng tak tak hmanga thlemna, a bikin celebrity leh midangin an siam hi, thil dik tak emaw rintlak tawk tak emaw pawh a ni hran lo," tiin an tarlang a ni.