Essy 'I Dang Zo Lo Maw?'

Ṭhazual award 2020-a Best Duo/Group award dawngtu zinga mi 'Inchhuang mai lo la' hitmaker Essy chuan zanin hian music video thar a tichhuak dawn.

Essy hian music video thar hi  'I Dang Zo Lo Maw?' tih a ni dawn a, thla hnih liam ta velah khan a channel lamah chuan lyrics video a tichhuak tawh a, hla lungchhiat thlak lam niin, inngaizawng hlim taka awmte chu dawt thu vanga an inṭhenna lam hla a ni.

He hla hi Mangheta Chinzah phuah niin music leh recording hi MMTech Productions, Lal K Sailo kut chhuak a ni a, music video-a MUA chu hriati_fanai_makeup a ni bawk. Kum ruk liam ta vel aṭang tawh khan Essy hi Mizo artist langsar ber zinga mi a ni reng tawh a, a music video a hmuhnawm ṭhinin hla hit tak tak a tichhuak tawh ṭhin. Tuna mi pawh hi a hit leh turah beisei ang.

Hla phuatu leh music video puitlinna kawnga puitu zawng zawng chungah a lawm thu Essy chuan a sawi a, a hla thar hi zanin hian Zonet lamah en theihin a awm dawn a, karleh lamah YouTube lamah a awm dawn bawk a ni.