Global Citizen Festival-ah Queen inlan dawn

Global Citizen Festival vawi riatna chu September 28 hian Central Park's Great Lawn, New York City-ah neih a ni dawn. 

Kum 2012 aṭanga ṭan music khawmpui lianah hian Queen an inlan dawn a, Freddie Mercury aiawhtu tur chu Adam Lambert a ni. Zaithiam lar dang- Pharrell Williams, Alicia Keys, OneRepublic, H.E.R. leh Carole King-te an inlan dawn bawk.

Kum 2011 khan Belfast-ah MTV Europe Awards neih a ni a, hemi ṭum hian Queen chuan Global Icon Award dawngin Lambert hoin an zai bawk. Queen leh Adam Lambert hi inkawp chhoin an hmingah pawh Q+AL an ti mai 

ṭhin. Original band member zingah Brian May leh Roger Taylor-te an la tel a, John Deacon erawh a tel tawh lo thung. 

Global Citizen Festival hi Wolverine movie aṭanga kan hriat lar Hugh Jackman leh a nupui Deborra-lee Furness-ten an host dawn a ni. Rapper French Montana, Tony award-a best actor (musical) la thei Ben Platt leh Jon Batiste-te an inlan bawk ang.

Festival hian a tum ber chu retheihna umbo a ni a, khawvel ram hrang hrang hruaitute cho phur a, natna chi hrang hrang HIV/AIDS leh Polio laka beihpui thlak te, hmeichhia leh naupang dinhmun chawisan te, plastic bawlhhlawh tihrem kawngah leh mi zawng zawngin zirna inang khat an dawn theihna tura hmalakte a ni.

Global Citizen CEO Hugh Evans chuan, "Zaithiam lar, mi hriat hlawh host leh an thawhpui dangte an rawn pen chhuak hi kan lawm. He hunah hian retheihna umbo turin sorkar leh khawvela hruaitu liante kan ngen ang," tiin khawvel tidanglam thei tur festival buatsaih an tum thu a sawi.