Cardi B-i'n concert cancel vangin fan-te lungawi lo

Grammy-winning rapper Cardi B chuan Thawhlehni zan khan Indiana­polis-a concert a neih tur chu darkar khat pawh a awm tawh lo tihah a ṭhulh thut a, hei hian a fan-te a ti lungawi lo hle. 

Hip-hop star concert hi security lam thil avangin ṭhulh a nih thu sawi a, Indianapolice Metropolitan Police department chuan hemi chungchang hi an chhui mek thu tih an sawi nghal bawk. Concert neihna tur, Bankers Life Fieldhouse chuan twitter-ah concert ṭhulh a nih leh thut thu hi a sawi a, show neih tur hi September 11 atan siamrem nghal a ni. Concert hi zan dar 7-a ṭan tur a ni a, dar 6.24-ah ṭhulh a nih thu hi an puang chauh a ni. Hemi hma hian Cardi B, a hming tak Belcalis Almanzar hian sound-te enfiahin concert a neihna tur hmunte pawh a lo endik tawh a, mahse a himna lam ngaihtuah a nih vangin ṭhulh a ni leh ta a ni.