#Farmers Protest VS #India Together

Khawvel pum huapa lar pop icon Rihanna leh Swedish climate activist Greta Thunberg bakah Kamala Harris vahnu lawyer Meena Harris leh ramdang politician-te'n Delhi a sorkar laipui farm law dodala nawrh huaihawt mek loneitute an thlawpna thu social media-a an post chu India bollywood star, cricketer leh politician ṭhenkhatin an helh hle. Ministry of External Affairs pawhin ramdang miin India buaina chungchanga comment an nei hi na takin an chhang let tawh.

Farm law thar duh lo hian nikum November 26 aṭang khan loneitu pawl hrang hrang chu Delhi ramriah an pungkhawm a, tractor rally-te buatsaihin sorkar laipui dan siam thar duh lohna hi an lantir a ni. Sorkar laipui nen pawh vawi eng emaw zat an inbe tawh a, mahse inremna an la siam thei lo.

Loneitute nawrh huaihawt avang hian Delhi hmun ṭhenkhatah phei chuan internet an shutdown hial a, hei tak hi Rihanna leh Greta Thunberg-i te hoin an sawisel pakhat chu a ni. Mihring dikna chanvo palzutnaah an ngai.

#IndiaTogether #IndiaAgainstPropaganda a rawn lang e

Khawvel huapa milar leh ramdang mite'n loneitu nawrh huaihawt mekte an thlawp thu an auchhuahpui takah chuan India sorkar, BJP politician-te leh Bollywood star ṭhenkhat bakah cricketer ṭhenkhat chu an au chhuak ve nghal. India buainaah ramdang mi inrawlh an duh lo. #IndiaTogether #IndiaAgainstPropaganda an rawn thar thawh ve leh a ni.

Chung zinga langsar ber zinga mi chu India cricket pathian Sachin Tendulkar a ni. "India inpumkhatna hi tihchhuat theih a ni lo. Pawnlam mi chu thlirtu an ni thei, mahse an inrawlh ve tur a ni lo. India mite chuan India an hria a, thutlukna pawh an siam ang. Ram inpumkhat i ni zel ang u," tiin Rihanna leh midang chhanletna tweet a siam.

Virat Kohli leh PT Usha-te pawhin #IndiaTogether campaign hi an thlawp ve bawk. Rohit Sharma bakah Kangana Ranaut, Akshay Kumar, Ajay Devgn, Sunil Shetty leh Karan Johar-te pawh #IndiaTogether campaign auchhuahpuitu an ni.

Union home minister leh a pawlte 

Union home minister Amit Shah chuan,"Eng ngaihdan mahin India inpumkhatna a tichhe thei lo," tiin #IndiaTogether #IndiaAgainstPropaganda nasa takin a rawn thlawp ve bawk. An dan siam a ni bawk a Farm law thlawp thei nia lang chu a thlawp na hle.

Nirmala Sitharaman, JP Nadda, Kiren Rijiju leh politician dang eng emaw zat chuan ram dang mi India ram chungchangah an inrawlh chu an duh lo hle bawk.

Congress MP chhuanvawr Shahshi Tharoor ve thung chuan khawthlang milar thu post chhanglet tura sorkarin India milarte a hmang chu thil mawi lo tak a nih thu a sawi ve thung. "GoI (Government of India) in India celebrity-te khawthlang celebrity chhanletna atana a hmang hi thil mawi lo tak a ni. GoI luhlulna leh democratic lo taka a chetna vanga khawvel mithmuha India lan mawi lohna hi cricketer tweet-in a labo thei lo, Farm law sut se, loneitute nena buaina chingfel se, chutichuan  #IndiaTogether a awm thei ang," a ti.

P.Chidambaram pawhin Rihanna leh Greta Thunberg-te'n MEA an kai harh chu thil ṭha a ni tih sawiin, MEA hnenah chuan engtikah nge mihring dikna chanvo leh nunphung chungchanga buainain ramri a kham lo tih an hriat dawn tih a zawt.

Twitter leh social media hrang hranga comment aṭangin Farm law chungchanga India mipui ngaihdan a inang lo a, Rihanna te meuhin ngaihdan an rawn sawi takah chuan loneitute nawrh huaihawt chungchang hi internet khawvel lama India mite chawtui a ni tawh sa nen boruak a rawn alh thar nasa leh hle a ni.