Music subscriber nei tam ber Spotify

Music-streaming service Spotify chuan subscriber mak­taduai 108 an neih thu an puang a, subscription music service lian ber an ni. 

Nilaini khan Spotify hian second-quarter report an tichhuak a, 31% zetin subscriber hi an pung. An elpui leh hnaih bertu Apple Music chuan subscriber mtd 60 an nei thung. Spotify hian mipui mtd 232-in an service hi thlatin an hman ziah thu an sawi a, kum hmasa aiin 29% in an ṭhang. Apple ang lo takin Spotify hian a thlawna hmang ho tan pawh an hla ngaihthlak an phal a, aver­tisement an dah tel thung. Apple chuan thla tina hmang­­tute hi an tar chhuak lo a, Apple Music hmangtute hi chu subscriber vek ang an ni.

Spotify hian 'free trial' ni 30 chhung a tihsak thei a, hemi chhung hian credit card kimchang an dah tel chuan a thlawnin subscriber a nih theih. Apple-ah erawh thla thum chhung atan 'free trial' an pe ve thung a, mahse 'free subscriber' tih hun chhung an hawng ve lo thung.

Music subscriber neih tam lamah Spotify leh Apple Music-te an chungnung hle. Ngaithlatu leh subscriber nghah lamah Spotify thluk an awm lo. Chutihrualin Apple Music hi iPhone hman tamna US lamah chuan Spotify ai hian subscriber an ngah thung.

Spotify hi phone leh com­puter hmanga dah mai theih a ni a, mahni khawla 'install' tawh chuan khawvel huapa lar pha leh kan hla duhzawng awlsam takin a ngaihthlak theih a ni.