Mi hla copy vangin Katty Perry-i'n Pawisa a chawi dawn

Katty Perry, co-writer leh producer Dr Luke, Capitol Records leh an thawhpui dangte chu Christian rap song an copy avangin US dollar maktaduai 2.78 chawi tura tih an ni. 

Katty Perry hla, 'Dark Horse' chu kum 2008-a tihchhuah, Christan rapper Flame (Marcus Gray) hla 'Joyful Noise' copy nia puhin kum nga kal ta khan Marcus Gray leh co-author pahnihte chuan thubuai an lo thehlut tawh a ni. Hemi chungchang hi jury-ten an ngaihtuah hnuah Perry leh a thawhpuite hi thiam loh an chantir a, sum chawi tura  hrem an ni ta a ni. Perry hian $mtd 2.78 an chawi tur aṭang hian Flame hnenah hian $ 550,000 a pe dawn a, a bak hi a album tihchhuaktu Capitol lamin an pe ve thung ang. 

An thubuai ngaihtuah a nih lai hian Perry attorney-te chuan 'Dark Horse' siamtute hian 'Joy Noise' hi an hre ngai lo a, Christian rap song pawh an ngaihthla ngai lo tih an sawi ve thung. Mahse jury member pakua-te chuan track pahnihte hi uluk taka an ngaihthlak hnu leh, music leh sound expert-te thusawi hrang hrang an ngaihthlak hnuin thiam loh an chantir ta a ni. 

Gray leh a co-writer-te chuan an hla copy a nih avang hian $mtd 20 zet chawi turin an phut a, an thubuai hi Thawhlehni aṭang khan ngaihtuah a ni. Ningani khan jury-te chuan thutlukna siamin, Katty Perry leh a thawhpuite chu $mtd 2.78 chawi turin a titlu ta a ni.

Pop, trap leh hip-hop hybrid, 'Dark Horse' hi 2013-a Perry album tih­chhuah "Prism' ami a ni. Kum 2014 kumtir khan he hla hi Billboard Hot 100-ah kar li chhung zet a awm a, Grammy nomination pawh a lo hmuh phah tawh bawk. Gray-a attorney chuan 'Dark Horse' hla hi 'Prism' album hlawhtlinna chhan niin a puh. 'Prism' album hi tihchhuah a nih karah copy 286,000 zet hralhchhuah nghal a ni a, Perry album a tihchhuah zingah hralh chak ber a ni bawk.