Thawnthu Lungchhiatthlak Ber a hit

Tunhnaia 'Thinlung Khawngaihthlak' thiam taka a sak avanga Zoram mipuiten kan hriat, Francis-a, Triau Trackx vocalist Ruatfeli leh Naupang Kawlhrawng-te hla thar 'Thawnthu Lungchhiatthlak Ber' chu Ningani tlaiah khan a lyric video tihchhuah a ni a, a hit nghal hle. 

Ni khat lek hnuah YouTube viewer nuai chuang an nei nghal der mai a, a hit tih loh rual a ni lo. Mizo mipui tlemte zingah heti tak maia entu an tam nghal hi thil thleng tam lo tak a ni a, he hla buaipuitu (Triau Trackx) drummer Ramenga pawhin an beisei phak bak fe a nih thu Vanglaini a hrilh. "Keima rilru tak takah phei chuan ngawlvei nun puan chhuahna tawp a ni si a, ngaithla duh an tam ka ring ngam miah lo a," tiin a sawi hial.

He hla hi Ramenga sawi ang hian ngawlvei nun puanchhuahna hla a ni a, YouTube comment lamah pawh fakna a tam hle a, hei hi he hla siam­tute lawmna pawh a ni. 'Thawnthu Lungchhiatthlak Ber'  hi rapper Naupang Kawlhrawng bul ṭan niin, Ramenga hian a phuahpui a, SM Digital Recording Studio, Champhaiah recording tih a ni thung.

Ramenga chuan he hla hi Music Video pangngai an shoot ṭan ṭep tih sawiin, a hla thu hi an dah pawimawh avangin mipuiten a hla thu lo hre phawt se an duh tih a sawi. Hemi a nih avang hian a lyric video hi an tichhuak hmasa a ni. Music Video kan hmu thuai turah ngai ang.