Anti-bullying campaign-ah BTS leh UNICEF

K-pop superstar, BTS chuan school-a intih­duhdahna (bullying) thleng ṭhin titawp tura campaign-na, #ENDvio­lence-ah UNICEF a thawhpui. Hemipual hian UN International Day of Friendship, July 31 khan video clip an tichhuak a ni. 

BTS hian an band twitter-ah, "Love MYSELF campaign kan neih hi ṭhalai leh naupang zawk hnena midangte chunga ṭhatna leh hmangaihna lanchhuah tir tura fuihna a ni," tiin an sawi. School-a intihduhdahna thleng ṭhin titawp tura mi tinte ṭan la tura an duh thu an sawi bawk. 

Tleirawlte zinga tha­rum thawhna thleng ṭhin titawp tura BTS-in Love Myself campaign a buatsaih zul zuiin UNICEF hian project hi a siam a ni. #BTSLoveMyself hastag hi vawi 10,463,503 zet share a ni tawh bawk. UNICEF chuan, "School hi mi tam zawkin kan ṭhianṭhate kan chharna hmun a ni. Mahse hetichung hian naupang kum 13-15 inkar, hmun thuma ṭhena hmun khat chuan school-ah tihduhdahna hi an tawk a, hei vang hian naupang tam tak tan school kal chu thil hrehawm tak a ni thei. Hei vang hian BTS chuan UNICEF-in #ENDviolence campaign a neih peng pakhat atan naupangte chu midang chunga ṭhatna lanchhuah a, midangte hlimna thlentu ni zawk turin a ngen a ni," a ti. Midangte chunga ṭhatna lantir chuan khawtlang nuam leh him a siam dawn a ni, tiin a sawi. 

BTS hian May 4 aṭang khan Love Yourself: Speak Yourself tour an nei a,  khawpui lian 10-ah show neih an tum. July thla chhung khan Japan ramah show vawi li neiin, heta ṭanga sum an lakluh hi US dollar maktaduai 20 zet a tling. Tour an neih tawh aṭanga an sum lakluh hi  $ mtd 99.3  a tling tawh tih Billboard chuan a tarlang bawk.