Mizo Kristian film 'Grace'

Mizo film hlawhtling Thingtlang Tlangval director Malsawma Fanai chuan nakkum kumtir lam hian Mizo Kristian film 'Grace' an tihchhuah tur thu Vanglaini a hrilh.

Thingtlang Tlangval aṭanga Mizoten an hriat lar Zuali lema chang Rosangpuii Ralte pawh a tel dawn a, film buatsaihtute pawh 'M_Space' tho an ni ang. Malsawma Fanai chuan, "Film thar siam tumin hma kan la mek a, tun ṭum chu Kristian film lam a ni dawn. Nakkum kumtir lamah tihchhuah tum a ni a, khehpuam a sumdawnna leh zuin chhungkua a tih nat dan tarlanna lam a ni ang," tiin Vanglaini a hrilh. 

A thawnthu hi Mafaki leh Zorema Khiangte, Mission Vengthlang-te ziah a ni a, Film chang tur thlanna (Audition) hi neih fel thuai tum a ni a, tel duh tan Ph : 9612612884-ah zawh fiah theih a ni.