Jessica Simpson-i'n John Mayer nen an inkar thuruk a sawi chhuak

American singer Jessica Simpson chuan a 'memoir' thar Open Book-ah John Mayer nena an inngaihzawn lai chanchin a tarlang a, khawthlang lam media-te chuan an ngaihven zui hle.

Simpson hian Mayer nena an inngaihzawn ṭanna, an inngaihzawn laia an inkar thu leh a theihnghilh theihna chhante a ziak a, milar tak ve ve anni bawk a hei hian ngaihventu a ngah hle a ni.

February 4-a tlangzarh a tum a lehkhabu-a a thuziah ṭhenkhat chu 'People'-ah tarlan a ni a, hei hi entertainment media hrang hrang chuan an lachhawng nasa hle. Kum 39 mi ni ve tawh Simpson hian 2005 khan Mayer hi party-naah a tawng tih thlengin a ziak a, a pasal hlui Nick Lachey nen an inṭhen hnu lawk a ni bawk nen an intawn hnu hian hun eng emaw chen an inbiak hnuah an in-'date' ta tih thlengin a ziak lang.

John Mayer hian a duh hle nia sawiin, amah zawng zawng a nei thei dawn lo a nih chuan neih loh hial pawh a thlang zawk niin a ziak a ni. Vawi tam tak a duhzia thute pawh a hrilh fo a, mahse an inngaihzawnna kha nuam a ti tak tak ngai lo. Mayer nen an inzui lai hian 'anxiety' a neih tak avangin zu a in nasa hle tih thlengin a ziak lang bawk. (Simpson hian 2017 khan zu a nghei leh chauh a ni).

Theihnghilh tawp pawh harsa a ti ve hle a ni ang, 2010 thleng kha chuan an la inbe reng a. Mahse Playboy-in Mayer an interview-naa a ṭawngkam vanga a theihngilh tak thu a ziak lang bawk. John Mayer hian Playboy hnenah hian Simpson chu a tan chuan ruihhlo ang mai a nih thu a sawi a, ruihhlo chu tih tam lutuk chuan a ṭha lo a. Simpson kha ka tan 'cocaine ang mai a ni, tia a sawi a hriat chuan a number paihin a be zui ta lo niin a sawi a ni.

Khawvela mi inngaitlawm ber nia ka hmuh kha a ni lo tih ka hriat hnuah a number ka paih a, awlsam takin ka kalsan thei ta a ni, a ti.

John Mayer hian milar tam tak a 'date' tawh a, chung zingah chuan Taylor Swift, Katty Perry leh Jennifer Aniston-te pawh an tel a ni.