Ed Sheeran-a'n U2 record khum dawn
British singer Ed Sheeran tour neih mek 'Divide tour' chu Zirtawpni-a Germany-a neih zawh a nih hunah chuan khawvela tour lian ber, chhimtu tamna ber leh sum lalut hnem ber a ni tawh dawn.
Ed Sheeran chuan a instagram-ah,"Show chhimtu zawng zawngte hnenah lawmthu ka sawi a ni, Show 12 a la awm a, kan theihnghilh tawh ngai lo ang," tiin a ziak hial a, a lawm ve hle tih a hriat.
'Divide tour' hi March 2017 aṭang khan a nei ṭan a, a tour neih ṭum thumna a ni. A studio album pathumna 'Divide' behchhana tour a neih hi a hlawhtlinpui hle a, August 26 hian Ipswich-a Chantry park-ah a hmawr bawkna a nei ang.
Ed Sheeran leh U2
U2 tour record siamah khan ni 760 tour-na atan hun an hmang a, Ed Sheeran hian tour a zawh meuh chuan ni 893 a hmang ang. Sheeran hian U2 vocalist Bono leh a co-tour attendance record maktaduai 7.3 chu May thlaa France-a tour a neihnaah khan a khum a, mi 7,315,970 zet an tel.
Pollstar chuan 'Divide tour' aṭang hian $mtd 736.7 lalut tawh angin a chhut a, 2011 khan U2 hian $mtd. 735.4 laluta record an lo siam tawh chu a khum a ni.