Meghan Markle-i'n lehkhabu ziah a tum

Prince Harry nupui, Meghan Markle chuan lehkhabu ziah a tum. Mahse a lehkhabu ziah tur hi ama chanchin ni loin, naupang lehkhabu a ni dawn tih sawi a ni.

Lehkhabu a ziah aṭanga hlawkna awm chu charity tan a thawh vek rin a ni bawk. Meghan Markle hian lal chhungkaw member dang, Prince Charles leh Sarah Fer­gu­son-te hnung a zui ve dawn niin a lang. Prince Charles hian kum 1980 khan  naupang lehkhabu, 'The Old Man of Loch­nagar' a tichhuak a, Ferguson-i hian kum 1990 chho khan Budgie the Helicopter series a tichhuak bawk.

Duchess of Sus­sex hi British Vogue magazine, September issue-ah guest editor-ah a ṭang bawk a, lehkhabu a ziah tur pawh hi a phur tawh hle tih sawi a ni. Mahse hemi chungchangah hian lal chhungkaw lam aṭangin sawichianna a la awm lo thung. 

Mi larten naupang lehkhabu hi ziah an ching viau a, hralh pawh a kal thei hle. Britain's Got Talent judge David Walliams-a'n naupang lehkhabu a ziah chu UK-ah a hlawhtlinpui hle a nih kha. US megastar-te pawhin an lo ziak fo a, US president hlui Barack Obama leh pop icon Madonna thlengin hetiang lamah hian an lo inrawlh tawh a ni.