Bruce Lee fanu lungawi lo

Shannon Lee chu 'Once Upon A Time in Hollywood' film-a a pa Bruce Lee lan danah a lungawi lo.

Kum 50 mi Shannon Lee chuan, "Ka pa kha thinchhiat hmel takin a lang a, film aṭanga teh kha chuan mi chaldelh tak leh chapo tak niin a lang. Film khan ka pa nihna a pholang lo," tiin a lungawi loh thu 'The Wrap'-in an  interview ṭumin a sawi.

'Once Upon A Time in Hollywood' hi July 26 khan US-ah tlangzarh a ni a, director hi Quentin Tarantino a ni. He film-ah hian Bruce Lee lema chang Mike Moh leh Cliff Booth (Brad Pitt) chungchang chu thil thleng langsar a ni. Shannon chuan, "Theatre-a mipui nuih danah khan ka lawm lo," tiin Mike Moh chet dan chuan a pa zia a phawk chhuak pha lo tih a sawi.

He film-ah hian Titanic star Leonardo DiCaprio pawh a tel a, Australian actress Margot Robbie chu a changtunu a ni bawk. He film hi Los Angeles khua kum 1969 hunlai vel anga chan a ni.