Priscilla Fanai - Ka duh leh duh loh Duhtu an tam ber

Zote Honda Ṭhazual Lengzem chart-ah roreltu thar an awm a, chu chu Priscilla Fanai  'Ka duh leh duh loh' a ni. Seraphic Choir 'Medley' chuan hma sawn zelin pahnihnaah an inhlangkai a, Josephine Lalawmpuii 'Khep khep maia' chu pathumna a ni bawk. 

Priscilla Fanai hla 'Ka duh leh duh loh' hi tunlai lengzem hlaa thlan hlawh ber a ni a, a hla mawina leh hla dangdai tak a nihna chu engpawhchu nise, a music video hrim hrim pawh hian entute a hip nghal hrim hrim ti ila kan sawi sual awm lo e.

He hla hi Zoram rimawi khawvela hriat hlawh tak Lal K Sailo phuah a ni a, tunlai ṭhalai rilrem zawng tak hla a ni. Music video hmuhnawm tak hi Blue and Yellow Production kutchhuak a ni a, a music pawh hi Lal K Sailo kutchhuak bawk a ni. Video-an shoot laiin KV Paradise, Durtlang hun eng emaw chen khar a ngai hial a nih kha. 

Chumai a la ni lo a, model tur hian Mister India Navleen Singh an chah lut bawk a, a video pawh a hmuhnawm viau reng a ni.

Priscilla-i chuan collaborate pui nei loa chart-ah dinhmun ṭha tak a hauh thei chu a lawm tih Vanglaini a hrilh. "Ka hah pui bawk a, ka thawk rim bawk a, ka thlen chinah hian ka lawm tak zet a ni. Pahnihna ka nih pawh khan ka lawm lutuk a ka lawm mante kha durtlang BSUP a chhiat tawk te tan ka hlan vek tawp," tiin a sawi.

Chart-ah hun eng emaw chen kan hmu tawh a, hmasawn zawngin an kal zel. Tunah chuan pahnihna dinhmun hial an luah tawh a, hma an sawn zel pawh a rinawm. Chart-ah pakhatna dinhmun an luah thei dawn em tih chu hriat chakawm tawh tak a ni.

Pathumnaah hian ṭum hnih lai pakhatna dinhmun luah thei Josephine Lalawmpuii 'Khep khep maia' chu a awm ve thung. Josephine-i 'Khep khep maia' hi chart-ah a la cham rih a rinawm a, thlan a la hlawh chhoh zel pawh a rinawm.

HT Lalthanzami  'Di rialin' chu palinaah a awm a, panganaah hian Jenny Jathang 'Nang nen' chu a awm ve bawk.

Chart-ah hmel thar hmuh tur pakhat a awm a, chu chu KR Robert 'Hello' a ni. Tunṭumah hian 10-naah awm mah se hmasawn zel thei a ni a, eng chen nge a thlen dawn tih chu hriat chakawm tawh tak a ni.