Jennifer Lopez-i'n Israel-a a concert hmasa ber nei

Jennifer Lopez-i'n Israel-a concert a neih tur chu Palestinian thlawptu lamten ṭhulh turin vawi tam tak ngen mah se, kar kal ta Ningani khan venhimna khauh tak karah concert hi a nei ta tho a, mi 57,000 zetin an chhim. Hei hi J-Lo-i'n Israel rama concert a neihna hmasa ber a ni.

J-Lo hian 'It's My Party'  international tour a nei mek a, Tel Aviv-a Park Hayarkon-a concert a neih tur hi Boycott, Divestment and Sanctions movement chuan ṭhulh turin a ngen a, concert a neih chuan human rights palzuta puh, Israel a thlawpna a lantirna a ni ang, ti hialin an sawi. 

Boycott, Divestment and Sanctions movement-in an ngen avang hian Beyonce, Lorde leh Lana Del Rey-te chuan Israel-a tour an neih tur hi an lo ṭhulh phah tawh. Mahse J-Lo hma hian Madonna leh Jon Bon Jovi-te erawh chu Israel-ah hian an lo perfom lui ve tho a ni. 

J-Lo hi Israel-ah hian a bialpa, Alex Rodriquez leh a fate Max leh Emme-ten an ṭawiawm a, hun hlimawm tak an hmang bawk. Jerusalem leh sakhaw hmun pawimawh, Church of the Holy Sepulchre leh Western Wall-te an tlawh bawk.