C. Vanlalmalsawmi North East Diva-ah pathumna a ni

Miss Mizoram dinhmun hial pawh lo chelh tawhtu C. Vanlalmalsawmi chu Miss India Universe thlanna tur atana kawng pawimawh tak, North East Diva-ah pathumna a ni. 

He beauty peagent-ah hian Malashya Kashyap, Assam mi chu winner a ni a, 1st runner up chu Protikhya Gondhia a ni thung. NE Diva-ah hian hmarchhak hmun hrang hrang aṭangin nula pian nalh leh chhe lo rual an fuankhawm a, Audition round paltlang mi 20 an awm a ni. Audition round paltlang zingah hian Sikkimese, Naga leh Mizo pakhat ṭheuh telin a dang zawng chu Assamese an ni a, heng zinga a cheṭha ber zinga Mizo nula a tel thei hi thil namai a ni lo a, a chhuanawm hle a ni.

NE Diva Grand Finale hi Pathianni khan Guwahati-a Taj Vivanta-ah an nei.

Vanlalmalsawmi hi a tirah tak chuan Femina Miss India-a tel tum a ni a, mahse Zonet lamin Miss Mizoram aṭanga thlan chhuah an tirh ṭhin avangin Miss Diva lam a hawi ta zawk tih Vanglaini a hrilh. Hetiang a nih avang hian a duh angin inpuahchahna pawh a nei ṭha hman lo a, mahse pathumna a ni pha ta tho a ni.

North East Diva hi Mizo-ten kan la hre vak ngai lo ngei ang. A chhan chu kum 2013-a bulṭan chiah kha a ni a, tun hi a ṭum thumna chiah a la ni bawk. C. Vanlalmalsawmi hi Mizo zinga he beauty peagent-a inlan hmasa ber a ni.

Grooming, designer leh show production zawng zawng hi Mumbai leh Delhi lama mithiam tak takte vek an ni a, hmarchhak mite tan chuan hei aia ṭha hi a awm chuang lo nia a hriat thu Sawmi ngei pawh hian a sawi. 

Hetiang boruak sang tak hnuaiah hian Sawmi hian show hi a enjoy hle thung a, nuam a ti hle bawk tih Vanglaini a hrilh. NE Diva winner hi direct-in Miss India Universe 2020 (Mumbai)-ah a qualify nghal a, pahnihna leh pathumna pawh hi audition nakkuma neih turah an tel bawk ang. Hemi atan hian Sawmi pawh hi a inbuatsaih leh nghal dawn a ni.

Miss Diva hi Miss India Organisation hnuaia awm tho a ni a, tunhma chuan Femina-a pakhatna-te chu Miss Universe-ah an kal ṭhin a, pahnihna-te chu Miss World-ah an kal thung. Mahse Miss Universe a kal tur thlanna hi tunah chuan a hrangin neih a ni tawh thung a ni.

Femina Miss India competition-ah chuan state tin aiawh an tel ṭhin laiin Miss Diva-ah erawh hi chuan India ram pumah mi 20 chiah thlanchhuah an ni thung. Miss Diva aṭang hian Miss Supranational-a tel tur pawh thlan an ni ṭhin bawk.