Album thar tlangzarh turin Coldplay an inpeih?

British rock band Coldplay chu album thar tlangzarh turin an inpeih leh tawh hle niin khawthlang media ṭhenkhat chuan an tarlang.

Chris Martin, Jon Buckland, Guy Berryman leh Will Champion-te album thar tur hi 'Music of the Spheres' tih a ni dawh tih thlengin chiang takin an tarlang leh tawh. Coldplay fan-te tan chuan thu lawmawm tak a ni tih a chiang.

The Sun chanchinbu chuan Chris leh a thawhpuite hian tunhnai hun eng emaw chen chu  an album thar tur chungchang hi an sawi thawi tawh a, tunah chuan a tak ram a chan hun a hnai ta, tiin an report. "Lockdown lai khan music thar siamin an buai hle a, chu music tharte chu record-ah a hmawr an bawk a, chu record working title chu 'Music Of The Spheres' tih a ni. Chris leh a group-te chuan an album hming hi official-in an trademark tawh. Chutah chuan tour atana an mamawh mechandise zawng zawng pawh a tel. Fan zawng zawng tana hun phurawm tak a ni. An project hi a hmawr an bawk tawh dawn tih a chiang tawh," tiin an tarlang.

Kum 1996-a din Coldplay band hian studio album pariat an tlangzarh tawh a, 'Music of the Spheres' hi an studio album pakuana tur a ni. An album hnuhnung ber 'Everyday Life' kha kum 2019 tawp lama an tlangzarh a ni a, mahse khami album tihlarna tur khan tour an nei lo. 

Coldplay hian nikum lamah khan an concert-in environment tan thil ṭha a thlen dan tur an ngaihtuah chhuah hma loh chuan concert an nei tawh dawn lo tih an lo sawi tawh a, hemi vang hian an album hnuhnung ber tihlarna tur pawh khan tour an nei lo hial. Carbon neutral concert buatsaih dan tur an zawng a ni.

'Fix You' hitmaker Coldplay hian Grammy award pasarih lai an dawng tawh a, nomination phei chu 30 lai an hmu tawh. An record hi khawvel pumah maktaduai 100 chuang an hralh tawh bawk.