K-Pop girl group kumin chhunga America rama parvul turte?

Forbes magzaine chuan kar hmasa khan kumin chhunga khawthlang ram ropui America rama par chhuak tura an beisei K-Pop girl group ṭhenkhat a tarlang a, Itzy, Twice, Loona, (G)I-dle leh Red Velvet-te hming chu an beisei san a ni.

Khawchhak lamah mai ni lo, khawthlang ram lamah pawh K-Pop artiste-te hi an tlana a, a lar pawh an lar narawh. Amaherawhchu, Billboard chart aṭanga a lan dan chuan khawthlang lam runtu K-Pop artiste langsar ber ber chu mipa lam an ni tlat. BTS, Psy leh SuperM-te hming chu heng zingah hian ri ring zual an ni a, Korean music thlipui tleh vawi khatnaah anni hming hi a larngsar. Hmeichhiaah chuan tun dinhmunah chuan Blackpink an langsar fal tih erawh tumahin kan hnial a rinawm lo.

Kum 2021 kan chuangkai ṭan a, Forbes chuan K-Pop girl band panga, kumin chhunga khawthlang lam run thei, thlir bik tlak nia an rin an tarlang. Heng band-te hi an ramah lamah erawh lar tak vek an ni tawh hlawm.

JYP Entertainment-in an din member panga awmna Itzy-te hian kum 2019 kumtir lamah khan an album hmasa ber an tichhuak. 34th Golden Disc Awards-ah khan Rookie of the Year atan thlan an lo ni tawh a, 2019 Melon Music

Awards leh 2019 Mnet Asian Music Awards-ahte Best New Female artist-ah thlan an ni tawh bawk. Billboard's World Albums chart-ah No.5 hialte pawh an lo thleng tawh. Canada lamah phei chuan an huhang a na tawh hle.

Twice hi JYP Entertainment din bawk an ni a, member pakua lai awmna band hi band naupang zawk zawk an ni tawh lo. Kum 2015 khan an EP hmasa ber an tlangzarh daih tawh.

South Korea leh Japan lamah chuan an tlana reng tawh a, Canadian Hot 100-ahte pawh bu an khuar tawh. Billboard World Albums chart leh  World Digital Song Sales chart-a  Korean act hmeichhia topper ni ve ve thei hmasa ber an ni.

Loona hi Blockberry Creative din an ni a, kum 2016 vel aṭang khan miin an hre ṭan tawh. 

Billboard 200 chart-ah nikum lamah khan an hming hmuh tur a awm zeuh tawh a, Billboard Pop Airplay chart-ah tunkar khan 40-na an rawn ni bawk. Anni hi he chart-a South Korean musical act lang thei parukna chiah an la ni.

Cube Entertainment-in kum 2018-a an din (G)I-dle hi nikum khan American record label Republic Records chuan contract an ziah pui.

iTunes Top Albums chart-a Korean girl group record siamtu an ni a, Forbes China-in K-pop group an interview hmasa ber an ni bawk. 

A chunga girl group kan tarlan zawng zawng ai hian Red Velvet hian Billboard chart-ah sulhnu an nei ṭha zawk a tih theih awm e. Kum 2014 aṭang daih tawh khan an hming a lang tawh.

World Digital Song Sales ranking-ah ṭum 20 aia tam an lang tawh bawk. Time leh Billboard-a K-pop group lar ber zinga mi an ni tawh a ni.