Hontrade International Ṭhazual Lengzem Kimkima a thiam ber A zun ngaih lunglen a bang thei lo!

Kimkima chuan a hla hit 'I zun ngaih lunglen' tih hla hmangin Hontrade International Ṭhazual Lengzem-ah No.1 a hauh. Chart hmasa-ah khan pali-na a lo nihpui tawh a, tun ṭumah erawh a vawi khat nan dinhmun sang berah a rawn inhlangkai ta a ni. 

Kimkima hian nikum December thla khan a hla thar 'I zun ngaih lunglen' hi a tichhuak a, Krismas borauk nen a innan chin avangin a hit vak pawh a beiseiawm loh. Amaherawh chu mipui duh leh rilrem zawng tak a lo nih avangin a lar ta em em a, tunlai lengzem hla lar ber tihngam a lo ni ta hial. 

A tirah a lyrics video chauh a tichhuak a, heti chung hian mi maktaduai hnih chuang zetin an view der tawh. A lyrics video hi YouTube-ah upload niin, official music video pawh Zonet local channel lamah chuan tihchhuah a ni tawh a, YouTube-ah pawh hmuh theihin chhawpchhuah a ni tawh bawk. 

He hla hi ama phuah a ni nghe nghe a, a thu pawh a ṭha dap dap hle. Recording hi Kings & Prophets niin, video hi William Lalrindika siamsak a ni thung. He hla hi Ṭhazual Award 2018-ah pawh khan a perform a ni. 

Tun ṭum chart-ah hian Mizo Idol aṭanga mipuiin kan hmelhriat chhoh tak Ticos Darhmingliana chu top 3-ah a inhlangkai a, Rpa Ralte ft G'nie leh Kimkima-te chiah a tluk lo. Ticos-a hian a hla thulkhung 'Lungmawl Duhsam' chu music video siamin a hlawhtlinpui chho mek a, thlan pawh a hlawh hle a ni. 

'Tuman an tluk lo'  tih hla hmanga chart hmasa lama No.1 lo hauh tawhtu Feli Fanai chu palina-ah a awm ve thung a, Dj Lalvenhimi chuan a dawt. DJ-i hian Ṭhazual Award a lo dawnpui tawh 'Ni thar duhawm' chu a hlawhtlinpui zui zel a, mipuiin an la ngaithla kham lo tih a lang. 

Essy chuan a hla thar 'Hringnun' tih hmangin parukna a hauh a, Jojo leh Fela Colney-ten an dawt. Top 10-ah hian Manuna & Feli Fanai bakah Richard Chawngthu pawh a lang bawk a ni. 

1. Kimkima - I zun ngaih lunglen

2. Rpa Ralte ft G'nie - I la hria em 

3. Ticos Dara - Lungmawl Duhsam

4. Feli Fanai - Tuman an tluk lo 

5. Dj Lalvenhimi - Ni thar duhawm

6. Essy - Hringnun 

7. Jojo - Tunah zawng 

8. Fela Colney - Sensiari 

9. Manuna & Feli Fanai - I leng dun zel ang 

10. Richard Chawngthu - Beiseinain