Bollywood-ah Manushi Chhillar?

Miss World lo ni tawhte hnungzuiin, Manushi Chhillar chuan Bollywood a luhchilh ve dawn niin sawi a awm leh ta. Miss World 2017 Manushi hi Indian film director lar Farah Khan nen an thawkdun dawn niin an sawi a, a film channa hmasa ber tur hi an buaipui mek niin an tarlang. 

Haryana nula Manushi Chhillar hian Miss World title a lak hnuah, Bollywood a luhcilh dawn nia sawi a tam hle a, nikum lam pawh khan sawihat a lo awm tawh a ni. Manushi hi Miss World lo ni tawh - Sushmita Sen, Aishwarya Rai leh Priyanka Chopra-te hnungzuiin Bollywood-ah a zuanglut a ni pawhin a mak lo ang. 

Indian film director hmeichhe tlemte zinga mi Farah Khan nen hian tun hnaiah an inhmu nge niin an sawi a, a bak erawh hriat zui tur a awm rih lo. Farah Khan hi Bollywood mai ni lo, Hollywood thlenga Deepika Padukone lo vawrh lar tawhtu a nih avangin, Manushi Chhillar nen hian an thawkdun a ni pawhin thil mak a ni hran lo. 

Kum 21 mi Manushi Chhillar hi 2017 khan Miss World atan thlan a ni a, India-in kum 17 zet liam hnua hetiang dinhmun thleng thei a neih leh hmasak ber a ni. Manushi hma-a Miss World title la thei hnuhnung ber chu Priyanka Chopra (2000) niin, ani pawh hi Bollywood leh Hollywood thenga hriat hlawh a ni chho ta a ni.